Anti-drug crackdown nagpadayon

CEBU, Philippines - Gironda sa mga sakop sa Regional Special Operation Group kagahapon sa hapon ang balay sa notadong drug pusher sa Barangay Ermita, dakbayan sa Sugbo apan suspek nakaipsot.

Si Superintendent Rex Derilo, Deputy Regional Chief sa Regional Intelligence Division kinsa maoy nangulo sa maong operasyon miingon nga si Nonito Montemayor nakabantay sa kapulisan ug dali nga nakasibat sa iyang panimalay.

Adunay nadawat ang kapolisan nga impormasyon nga ang silingan niini maoy daling nipahibawo kaniya sa pag-abot sa mga polis, nahibaw-an usab nga dunay closed-circuit television (CCTV) cameras ang panimalay niini ug may sekretong exit sa ikaduhang andana nga gituohan giagian ni Montemayor sa pag-ikyas.

Ang pagronda pinasikad kini sa search warrant nga gi-isyu ni Judge Soliver Peras sa Regional Trial Court.

Duha ka pakete nga gituohang shabu nga mokabat og kapin P50,000 ang nakuha sa 2nd floor sa panimalay ni Montemayor kinsa gihulagway nga level 2 drug pusher.

Sa laing operasyon, arestado sa buy-bust operation sa kapolisan sa dakbayan sa Talisay ug Regional Anti-Illegal Drug Special Operation Task Group (RAIDSOTG)-7 kagahapon sa hapon ang usa usab ka notadong drug pusher diha sa Sitio Galaxy, Barangay Tanke, dakbayan sa Talisay.

Ang suspetsado naila nga si Mamerto Balansag,  kinsa mibaligya og duha ka paketeng shabu nga nagkantidad og P500 ngadto sa poseur buyer.

Dugang 38 ka gagmay’ng paketeng shabu ang naembargo sa mga polis nga nangronda gikan sa posisyon sa suspetsado.  Si Inspector Rodgene Fudotan sa Talisay City Police Station ug Senior Inspector Henrix Bancoleta sa RAIDSOTG ang nangulo sa maong pagpangronda. Samtang usa ka level 2 nga pusher ug tulo ka tawo nga naaktohan nga nanuyop og shabu sa panimalay niini sa Sitio San Jose 1, Barangay Labogon, Dakbayan sa Mandaue alas -9 sa miaging Huwebes sa gabii. Ang nadakpan mao si Nepomoceno Manlocot, 54,  samtang nadakpan usab sila si Sergio Ibag, 37, Jundee Wenceslao, 23, taga Barangay Labogon ug  Julito Roma, 40, nga nagpuyo sa maong dapit kinsa giingong nanuyop.

Ang laing nadakpang ‘pusher’ mao si Melyn Bermeso, alyas Mosing  apan nakaikyas. Si Bermeso ug Manlocot maoy target sa maong operasyon. Gawas sa napalit nga shabu nakuhaan usab si Manlocot og kalibre .38 nga armas.  (Jojo C. Ugdol, Brenda Batuto, Romeo Limpangog ug Jasmin Llanillo, USJ-R Intern/EIM)(BANAT NEWS)