Nagtusok og nubain sikop
CEBU, Philippines - Nakuhaan og mga syringe sa nubain ang lima nga gipangdakop atol sa saturation drive sa kapolisan sulod sa usa ka balay nga gihimo nga drug den sa barangay Calamba, dakbayan sa Sugbo.
Ang mga nasikop mao sila Arcadio Labay, 46, taga Lawis, Pasil, nga nakuhaan og 12 ka ampoules sa nubain, 12 ka syringe, usa ka .38 revolver nga dunay upat ka bala, ug usa ka .22 revolver nga dunay 27 ka bala; Monena Muñez Tejana, 29, nagpuyo sa maong lugar nga nakuhaan usab og 11 ka ampoules sa nubain ug 11 ka syringe, Epol Bakil, Mark Gabutan ug Adrian Posadas nga puros nakuhaan og nubain ug syringe.
Matud ni PO2 Emanuel Abergas sa San Nicholas Police Station nga nahinabi sa Banat News nga human nakadawat og impormasyon ang kapolisan labot sa ilegal nga kalihukan sa mga suspetsado, gihimo dayon nila ang operasyon.
Sumala pa ni PO3 Alexander Arias nga ilang nasikop ang lima ka mga dinakpan didto sa balay ni Labay nga gihimo niining drug den.
Dugang pa ni Arias nga usa sa nakuha nila nga impormasyon nga mga estudyante ang kasagaran nga kustomer ni Labay sa iyang negosyo nga nubain.
Gisubay karon sa kapolisan kung wala ba naapil sa gun-for-hire si Labay diin ang mga armas niini ang gipaubos na sa ballistic examination aron masayran kung wala ba kini nagamit sa mga ilegal nga kalihokan.
Gitanggong na sa detention cell ang lima ka mga suspek. (/GMR)(BANAT NEWS)
- Latest
