Suspek sa Ducayag murder mihimakak

CEBU, Philippines - Gihimakak ni Jeffrey Aquino, kanhi closed-circuit television (CCTV) camera operator sa usa ka shopping mall sa downtown area ang pasangil nga gipasaka batok kaniya kabahin sa kamatayon ni Mario Alfie Ducayag sa miaging tuig.

Si Aquino kinsa gilabanan ni Atty. Salvador Solima, ni plead not guilty kagahapon atol sa iyang arraignment sa kasong murder sa sala ni Judge Wilfredo Navarro sa Regional Trial Court Branch 19.

Si Solima masaligong huyang ang kaso batok sa iyang kliyente ug malaumon siya nga makapiyansa si Aquino.

Apan si Marie Shantylle Ducayag, igsuon sa biktima nagkanayon nga lig-on ang ilang ebidensya batok sa mga akusado nga naglakip ni  Mauricio Doblados, Jr., kinsa nagpabiling gawasnon ug kanhi head security sa maong mall.

Si Aquino ug Doblados giingong mikulata-patay ni Mario Alfie, residente sa Tuyan, Naga City, Cebu.

Si Marie Shantylle nanawagan sa kapulisan ug sa National Bureau of Investigation (NBI)-7 nga madakpan na si Doblados sa dili pa ang pre-trial conference ni Aquino karong Septembre 17, 2014. Si Mario Alfie, gipasanginlang nangawat og sandal sud sa maong mall apan giingong gibun-og kini ug namatay, base sa resulta sa re-autopsy sa NBI-7. (BANAT NEWS)