Babayeng “pusher” ug laing lalaki nakuhaan shabu ug marijuana

CEBU, Philippines - Usa ka babaye ug usa ka lalaki ang nadakpan ug nakuhaan og mga shabu atol sa gihimong saturation drive ug police checkpoint sa mga sakop sa San Nicolas Police Station kagabii.

Moabot sa siyam ka medium sized ug 20 ka paketeng gituohang shabu ang nasakmit sa duha ka managlahing operasyon nga gihimo sa mga sakop ni Sr. Insp. Chuck Barandog kagahapon sa kaadlawon ug sa milabay’ng hapon.

Atol sa saturation drive kagahapon diha sa A. Lopez Street, Barangay Calamba, Cebu City, nasikop ang usa ka Gina Osorio Sasan, 49, minyo taga Bacayan, Talamban Cebu City. Si Sasan nakuhaan og walo ka medium sized  ug 20 ka gagmay nga pekete nga pulos may sulod nga gituhoang shabu dihang giingong naaktohan kini sa nagpatrolyang mga polis nga namaligya og ilegal nga drugas.

Sa laing operasyon kagahapon sa kaadlawon nadakpan sa police checkpoint sa dalan Tupaz, Barangay Sawang-Calero si Mark Amon Jalang, 20, taga Tayud, Liloan.

Si Jalang nakuhaan og usa ka medium sized sa putos nga Marijuna. Matud pa ni Inspector Alejandro Lopez ang deputy sa station chief sa maong buhatan nabantayan nga way side mirror ang motor ni Jalang ug dihang ilang gipara nasakpan kining nagdala og usa ka medium size nga putos sa pinaugang marijuana.  Ang duha gikatakdang pasakaan og kasong kalapasan sa Republic Act 9165 tungod sa paghupot og ilegal nga drugas. (Jojo Ugdol/EIM)

Namato sa kabalayan napusilan sa polis

Lalaki nga namato og balay sa iyang mga silingan, gibadlong apan misukol sa silingan nga polis napusilan hinuon sa iyang sampot diha sa Sitio Kalubihan, barangay Talamban ning dakbayan sa Sugbo.

Ang napusilan ug nalandig sa tambalanan mao si Josefino Complitado, 32, usa ka stay-in hollowblock maker sa maong lugar, samtang ang nakapusil kaniya mao si Inspector Delfin Bontuyan, sakop sa Criminal Investigation and Detection Group (CIDG-7).

Sumala pa nga usa ka Emmanuel Rabor nga silingan ni Bontuyan ang nangayo og tabang tungod kay nakagay ang bildo nila nga bintana  tungod sa pagpamato ni Complitado.

Si Bontuyan kinsa natulog na niadtong tungora misubay sa lugar  ug dihang nakit-an si Complitado, nagpaila siyang polis ug gibadlong kini, apan gikatahong gisinggitan hinuon niya si Bontuyan nga wala kini gikahadlokan. Si Bontuyan wa makabantay nga duna diay dala nga .38 revolver ang suspek ug kalit kini mipusil kaniya, apan nakapasalipod na siyang daan sa kongkretong koral ug diha-diha gibawsan kini pagpusil sa sampot, dihang nahagba dali kining gidala sa Vicente Sotto Memorial Medical Center (VSMMC).

Ang agalon ni Complitado nga si Judel Orlanes mibutyag nga gikan sa pagbalik sa suspek niadtong Lunes gikan sa Tabuelan namatikdan nilang magul-anon na kini kay giingong wa mauyuni sa ginikanan sa hinigugma. Nakuha gikan sa supek ang .38 revolver nga dunay upat ka bala. (BANAT NEWS)