Sikyu gibunalan patay

CEBU, Philippines - Patay nang nadiskubrehan kilid sa guard house ang gwardiya sa gibantayan niining establisamento sa Sitio Laray, Barangay Pitogo, Lungsod sa Consolacion alas-9 pasado ang takna kagahapon sa buntag.

Si PO1 Socrates Borinaga sa Consolacion Police Station miila sa biktima nga mao si Jonathan Torrejos Paraasi, lumad nga taga dakbayan sa Toledo.

Matud pa ni Borinaga nga ang supervisor sa gibantayang establisamento nga Grande Sales Corporation nga si Robeo Yu ug asawa niini maoy nakadiskubre sa biktima.

Dugang pa ni PO1 Borinaga nga naghigda sa folding bed ang biktima nga naligo sa kaugalingong dugo nga gikan sa samad sa ulo nga gituohang agi sa pagbunal og tubo samtang kini natulog.

Upat ka mga trabahante sa maong establisamento ang boluntaryo nga nagpakuha sa ilang finger print specimen aron malimpyo ilang pangalan.

Ang Scene on Crime Operation (SOCO) maoy naghimo sa finger print ug ilang gipaabot nga mogawas ang resulta karong adlawa.

Si Borinaga miingon nga ang guardhouse anaa ra sa gate sa maong kompaniya. (BANAT NEWS)