Nitulis sa taxi driver sikop

CEBU, Philippines - Nasikop ang usa ka tulisan nga nisuway og tulis sa taxi driver human nakapangayo og tabang sa mga barangay tanod.

Ang dinakpan nailhan nga si Edito Tradio, 23, ulitawo, taga Bulacao, dakbayan sa Talisay.

Samtang ang drayber sa Tiger Taxi, nailhan nga si Cesar Incipido, 47, minyo, taga Lower Torre, Inayawan, dakbayan sa Sugbo.

Matud ni SPO3 Rene Barral sa Pardo Police Station nga nahinabi sa Banat News nga alas 7:35 sa buntag niadtong Lunes nahitabo ang insidente sa may dalan F. Jaca, sa Barangay Inayawan.

Ang suspek giingong nisakay sa taxi apan sa dihang didto na sa sulod kalit lang nga gitionan og .357 nga revolver ang drayber ug gikuha ang P3,800 nga kwarta ni Incipido.

Nakabantay ang drayber nga atbang lang sila sa Inayawan Barangay Hall diin adunay mga tanod nga naka-istambay sa lugar, hinungdan nga dali kining niambak ug nangayo og tabang samtang dali usab nga midagan ang tulisan palayo.

“Bahala na daw og mapusilan siya sir, nangursonada na lang gyod siya, ingon ang drayber basta lang daw madakpan ang tulisan,” matud Barral.

Daling milihok ang mga tanod ug mitawag og pulis resulta sa pagkasikop ni Tradio apan wala na na-recover ang kwarta nga nakuha gikan sa taxi drayber.

Gihulagway ni Barral nga daw sa wala pa katugpa ang suspek kinsa milimod sa pasangil batok niya.

Gitanggong sa Pardo Police Station ang dinakpan samtang nagpaabot nga kapasakaan og tukmang kaso. (BANAT NEWS)