Di granada, shabu apan kadudahan pa ang nasakmit sa kapolisan

CEBU, Philippines - Dili granada kundi shabu ang nakuha sa usa ka tawo nga gialarma diha sa Sitio Looc, Barangay Maribago, dakbayan sa Lapu-Lapu sa milabay’ng gabii.

Ang nasikop mao si Joseph Ramie Oyao Cortes, 48, residente sa maong dapit.

Sa pasiunang imbestigasyon ni PO2 Eric Fronda ug PO1 Rodney Pintac sa Station 2 nasayran nga mga ala 8:40 sa milabay’ng gabii naalarma ang mga residente sa maong dapit sa presensiya ni Cortes nga nagdala og granada.

Sa pagresponde sa kapolisan nasigpatan si Cortes nga nagbagal ang bulsa niini hinungdan nga gisugo kini ni PO2 Fronda nga ipagawas ang anaa sa iyang bulsa.

Inay nga granada, sudlanan diay kini sa onse ka gagmay’ng pakete sa gituhuang shabu  hinungdan nga gisikop dayon kini.

Atol sa imbestigasyon mihimakak si Cortes nga shabu ang nakuha sa mga pulis kundi mga tawas lamang nga iyang napalit.

Gumikan niini ang maong mga ebidensiya gipadala sa kapolisan sa PNP crime laboratory alang sa eksaminasyon ug kung masuta nga shabu ang maong mga ebidensiya kasong kalapasan sa RA 9165 ubos sa Art. II sec. 11 ang ipasaka sa kapolisan batok ni Cortes. (/EIM)(BANAT NEWS)