Sales agent gitulis, P40 mil nadagit sa tulisan
CEBU, Philippines - Nadagit sa tulisan ang dili momenos P40 mil nga kantidad sa nahitabong pagpanulis sa usa ka sales agent-collector sa sitio Sta. Ana, Poblacion dakbayan sa Toledo sa nakalabay’ng adlaw.
Si Lovely Colegardo, 21, residente sa barangay Magdugo syudad sa Toledo sales agent collector sa NDN Merchandise nga tigbaligya og ilimnon ang nabiktima sa tulis sa wala ilhing tulisan.
Matud ni SPO3 Basiliso Balicoco, duty desk officer sa Toledo City Police Station nga nahinabi sa Banat News nga naghatod ang biktima og mga order nga softdrinks ug ilimnon sa usa ka imnanan dihang kalit nga mibutho ang usa ka lalaki dayong tion og wala matino nga kalibre sa armas ug gibunlot ang dala nga shoulder bag sa biktima.
Nadagit sa tulisan ang usa ka cellphone nga cherry mobile ug dili momenos P40 mil nga halin sa gi-order nga ilimnon.
Daling misibat ang tulisan sakay sa motorsiklo paingon nga bahin sa lungsod sa Pinamungajan. Padayon usab nga giila sa kapulisan sa Toledo ang responsable sa maong pagpanulis. (BANAT NEWS)
- Latest
