Tag-iya sa trak nga nadisgrasya sa Carcar may laing kalapasan

CEBU, Philippines - Ang tag-iya niadtong trak de-karga nga nadisgrasya didto sa Guadalupe, Carcar nga nakapatay og siyam ka tawo ug mikalas sa kinabuhi sa daghang kahayopan nakalapas usab sa Animal Welfare Act.

Ang kanhi veterinarian sa dakbayan sa Sugbo nga si Dr. Alice Utlang miingon nga ang Animal Welfare Act naglatid nga kinahanglang rehestrado nga sakyanan nga gamiton isip hakotanan og hayop.

Ang pamahayag ni Utlang maoy iyang reaksyon tungod sa report sa Land Transportation Franchising and Regulatory Board (LTFRB) nga ang sakyanan nga iya ni Mario Panulagan wala marehestro sa Department of Agriculture nga kargahanan og mga hayop.

Matud ni Utlang nga ang mao nga sakyanan kinahanglan usab nga marehestro sa Department of Agriculture kalapasan kini sa balaod ug mahimong manubag niini si Panulagan.

Si Utlang miingon nga ang balaod naglantaw sa kaayohan ug proteksyon sa kahayopan mao nga kinahanglan g’yud nga ang pagkarga ug pagdiskarga sa mga hayop ngadto sa sakyanan angay’ng adunay pagtugot sa DA-7.

Gipahibalo usab ni Utlang nga kadtong mga negosyante og kahayopan sama sa mamalit ug mobaligya’g baboy, baka ug ubang kahayopan nga ibiyahe sa laing lugar magkinahanglan kini og lisensiya ingon man permiso gikan sa Department of Agriculture.

Gipasabut ni Utlang nga sigon sa maong balaod P5 mil   ang multa sa mga tawo nga nakalapas niini.  (BANAT NEWS)