Nababha sa giayo nga armas

CEBU, Philippines -  Maayong pagkababha sa paa sa usa ka lalaki dihang aksidente nga mibuto ang armas nga gipaayo sa silingan diha sa sitio Lemon, barangay Ibabao, dakbayan sa Mandaue alas-4 pasado ang takna sa hapon niadtong Lunes.

Ang biktima mao si Carlito Cabahug, 47, nagpuyo sa maong dapit kinsa nakabaton og samad pinusilan ibabaw nga bahin sa iyang paa gikan sa armas nga kalibre 45.

Si PO2 Dayang Bacus sa kapolisan sa Presinto 1 sa Mandaue City Police Office (MCPO)  miingon nga  usa ka Neil Iway, taga Minglanilla maoy giingong nag-ayo sa armas nga walay lisensiya diha sa panimalay sa biktima.

Samtang gikubi-kubian ang maong armas giingong gisigehan kini og kablit bisan dunay magazine nga dunay sulod nga bala.

Sa unang pagkablit wala kini moboto hinungdan nga kumpiyansa na lamang sa pagkablit-kablit sa gatilyo ang suspek hangtod nga mibuto kini ug naigo ang paa sa biktima nga nagtan-aw sa iyang gibuhat.

Ang biktima daling gihatod sa Mandaue City District Hospital samtang ang suspetsado dali nga misibat.  (BANAT NEWS)