Kalabera nga naugkat sa balay sa lider sa kulto gilubong na
CEBU, Philippines - Ang kalabera sa 14-anyos nga lalaki nga naugkat gikan sa gilubngan niini ilawom sa balay sa giingon’g lider sa kulto didto sa Balamban gibenditahan na ug gilubong sa sam-ang sa Naga. Masub-anon kaayo ang kabanayan ni Angelo Repuela diha nga gilubong na ang iyang lawas sa menteryo sa Barangay Naalad, Naga. Ang lawas ni Repuela naugkat sa tunnel ilawom sa balay ni Casiano Apduhan nga gihimoan og treasure hunting.
Ang iyaan ni Repuela nga si Anastacia Restauro mihulagway sa iyang pag-umangkon nga buotan kaayo nga pagka bata. Wa kapugngi ni Restauro ang pag-ambak sa iyang mga luha samtang miasoy nga di g’yud sila mosibog sa kaso nga ilang gipasaka batok ni Apduhan.
Ang amahan sa bata nga si Eleuterio Repuela nanghimakak nga iyang kagustohan ang nahitabo sa iyang anak ug matud pa siya gibutang-butangan lang ni Apduhan.
Wala g’yud matataw nganong namatay ang bayong-bayong ug nga ang iyang lawas gipasok sa tunnel nga giingong gihimoan og treasure hunting. Ang inahan sa biktima nga si Remigia miingon nga nahadlok sila karon sa ilang seguridad ilabi na nga ang NBI nagpahimangno kanila nga dili mokompyansa.
Nasayran nga gikasohan na og serious illegal detention, illegal possession of firearms ug gipaabot sunod semana ipasaka na usab ang murder case batok sa mga suspek. (BANAT NEWS)
- Latest
