Taga Maghaway, Talisay mireklamo sa mag-agos nga basura

CEBU, Philippines - Ang mga molupyo sa Barangay Maghaway, dakbayan sa Talisay nangreklamo sa kabaho sa basura nga moagi sa ilang dapit.  Gipadangat nila ang reklamo ngadto ni Konsehal Antonio Bacaltos, Jr. nga maoy tsirman sa committee on environment sa konseho sa siyudad.

Si Bacaltos mibutyag nga nakadawat siya og reklamo gikan ni Maghaway Barangay Kapitan Victor Cabatas kabahin sa kabaho sa basurang moagi sa ilang lugar paingon sa landfill sa Barangay Tapul. Matud ni Bacaltos nga si Cabatas mibutyag nga ang mga molupyo sa Maghaway magsige og adto sa ilang balay aron pagpadangat sa ilang reklamo.

Ang mga garbage truck giingon nga kargahan og basura nga ang uban gikan sa ihawan ug merkado nga dunay buslot hinungdan nga ang duga sa basura mag-agos sa karsada ug ang baho dugay mawagtang.

Usa sa apektado niini mao ang mga estudyante diha sa nahisgutang barangay tungod kay ang tunghaan maagian usab sa garbage truck.

Gibutyag ni Bacaltos nga ang mga molupyo naglaraw sa pagduso og petisyon nga dili na nila paagion ang garbage truck sa ilang lugar apan walay laing karsada nga maagian paingon sa Tapul. Kagahapon si Bacaltos miduso og resolusyon nga naghangyo sa mayor pagbutang og compartment o pagtapak sa mga buslot sa mga garbage truck aron dili motulo ang duga sa basura.

Laing resolusyon ang gisugyot ni Bacaltos kabahin sa estrikto nga pagpatuman sa solid waste segregation o paglahi-lahi sa mga basura. Si Bacaltos kaniadto mipalabang og resolusyon sa pagbutang og takub sa mga garbage truck aron ang mga basura dili magtagak-tagak. Gusto ni Bacaltos nga i-schedule ang pagkuha sa mga basura gikan sa malata ug dili malata, unya tabonan pag-ayo ang garbage truck.  (BANAT NEWS)