FDA —‘Onami’ di ipapalit sa publiko

CEBU, Philippines - Mipasidaan ang Food and Drugs Administration (FDA) sa publiko batok sa gibaligyang slimming underwear pinaagi sa internet.

Si Elvira Bongosa  sa Phil. Information Agency (PIA)7 mibutyag nga base sa FDA  Advisory 2014-005 gikan sa hepe  niini nga  si  Kenneth Hartigan-Go, gi-warningan   ang publiko batok sa pagpalit og “Onami” slimming underwear products nga giingong maka-detoxify sa lawas ug sunugon niini ang body fats.

“All consumers are hereby warned against buying the said unregistered product from the market or through online,” matud pa sa advisory.

Miingon  si  Bongosa  nga sayo  niini , nadiskobre sa FDA ang pagpamantala sa maong produkto nga daghang benepisyo ang gihikyad sama sa pag-detoxify sa lawas ug pagsunog sa body fats, pagpalig-on sa  immune system, pagpakusog sa metabolismo, makadugang sa mental alertness, makatangtang sa fatigue ug stress, ug mga sakit, ug makapawala og body odor.

Apan matud pa sa FDA, nga dili rehistrado sa ilang buhatan ang maong produkto ug wala usab kini clinical o scientific studies aron magpamatuod sa mga therapeutic claims niini.

Nagkanayon  si  Bongosa nga  ang FDA  maoy  tig-kontrolar sa tanang produktong adunay therapeutic o health claims, mao nga kinahanglan una sa maong slimming underwear nga mokuha og License to Operate (LTO) isip manufacturer o distributor gikan sa FDA.

Midugang  si  Bongosa  nga gitataw usab sa FDA nga kadtong mga health products nga nakaabot sa FDA standards lamang ang luwatan nila og Certificate of Product Registration (CPR).

Matud  niya  nga gimanduan na usab ni Hartigan-Go ang manufacturers ug distributors sa maong produkto nga tangtangon sa merkado ang produkto.

Bisan  ang  mga   mall owners ug mga outlet giawhag  sa  DOH  nga ipatangtang  ang produkto sa ilang mga tindahan, sumala ni  Bongosa. (/WC)(BANAT NEWS)