Bata napunggit sa Korean patay
CEBU, Philippines - Patay ang usa ka batang lalaki human kini madasmagan sa usa ka Honda Civic Sedan nga gimaneho sa usa ka Koreano sa alas 11:50 sa buntag miaging adlaw sa barangay Poblacion sa lungsod sa Oslob.
Giila sa kapolisan ang suspek nga si Lee Dong Won, 42, nagpuyo sa Suite Room 303 Rosdel Suites sa Talamban sa dakbayan sa Sugbo.
Si PO1 Noel Mamale, desk officer, nga nahinabi sa Banat News miingon nga ang suspetsado nagmaneho sa iyang Honda Civic Sedan ug misulay kini og overtake sa nag-una nga sakyanan.
Apan nadasmagan niya ang biktima nga milugnot gikan sa uyoan human sa ilang pagkanaog sa traysikol ug midiretso og labang sa dalan.
“Nagplete sa tricycle ang uyoan, gigunitan sa iyang uncle, midagan sa pikas, naigo sa Korean,†matud pa ni Mamale.
Daling gidala sa Oslob District Hospital ang maong bata ug gibalhin sa Dalaguete District Hospital ug didto na kini gideklarar nga patay na.
Ang suspetsado natanggong sa Oslob Police Station apan posibleng makagawas ra kini tungod kay nakig-areglo ra ang ginikanan sa bata.
“Nag-atubang na sila ganiha (kagahapon), nakig-settle ang ginikanan di na lang pasakaan og kaso,†dugang pa ni Mamale. (BANAT NEWS)
- Latest
