Presyo sa palaliton misaka

CEBU, Philippines - Nasuta  sa  Department of Trade and Industry (DTI) ang  pagsaka sa presyo sa mga palaliton ilabi  na sa mga sangkap sa pang-noche buena sa Pasko ug sa Bag-ong Tuig.

Sigun pa ni DTI-7 Regional Director Asteria Caberte nga  namatud-an sa ilang monitoring ang  maong  pagsaka  sa presyo  gikan  sa Nobiyembre hangtud na niadtong Disyembre 20 ning tuiga.

Apan giklaro hinuon ni  Caberte nga dili kaayo taas ang  maong pagsaka sa presyo   ug  ang  mga  palitonon  nga  apektado  niini  wala malakip sa basic commodities kansang  presyo  gipugngan  sa  DTI.

Gawas  niini  miingon  si  Caberte  nga  misaka  usab  ang  presyo  sa  mga  construction   ug  housing  materials.

Apan  matud  pa ni Caberte nga  dili  sila makaaksyon  niini  tungod kay sa pagkakaron wala pa sila’y nadawat nga reklamo gikan sa mga konsumedor.

Iyang giklaro nga ang ilang tukmang aksyon magkinahanglan og formal complaint gikan sa agrabyadong  pumapalit .

Gani  matud  pa ni  Caberte  nga  may nasakpan silang 58 ka  negosyante sa Bohol ug sa amihanang bahin sa lalawigan sa Sugbo nga nagpatuyang sa pagpasaka sa gipamaligyang basic commodities  human sa  bagyong Yolanda. Ang  uban  niini gipahamtangan  og  silot, apan  ang  uban  gihatagan  una  og  higayon apan  may  warning  nga  gihimo  ang  DTI  kanila,  matud  pa  ni  Caberte. (BANAT NEWS)