Polis sa Talisay limitado og supply sa gasolina

CEBU, Philippines - Gumikan  sa kadaginoton  ug kalimitado sa supply   sa gasolina,   ang kapolisan sa dakbayan  sa Talisay  dili  makahuygo sa ilang pagpatrolya  sa kadalanan  sa siyudad.

Si Talisay City councilor Danny Caballero, chairman sa committee on peace and order sa konseho sa siyudad nagkanayon  nga susihon niya ang maong report.

Matud ni Caballero nga angayang dugangan ang budget sa gasolina sa kapolisan aron dili maapektohan ang ilang operasyon ilabi na niining panahon  sa Pasko.  Nunot niini, si Superintendent Resty Santos, officer-in-charge sa Talisay City Police Station(TCPS) mibutyag nga matag sakyanan tag- P1,800 nga budget sa gasolina ang gihatag sa siyudad  alang  sa  duha ngadto sa tulo ka adlaw.

Ang TCPS adunay  tulo ka patrol car  nga nagdagan nga mao  ang duha ka Innova  ug usa ka Hilux   ug  may  walo  ka motorsiklo.

Dugang ni Santos nga naningkamot silang dili gyud maputol ang ilang serbisyo ngadto sa katawhan. (/WC)(BANAT NEWS)