Usa patay, 42 angol sa pagkahugno sa Mandaue City Public Market

CEBU, Philippines - Usa ang kompirmado nga namatay ug 42 usab ka tawo ang naangol gikan sa nagkalain-laing  dapit sa dakbayan sa Mandaue ug sa new public market sa dakbayan.

Ang namatay ug siyam ka mga nangaangol sa merkado natagakan sa glass panels sa ibabaw nga bahin sa edepisyo atol sa nahitabong linog alas -8 pasado ang takna kagahapon sa buntag.

Si Chief Inspector Jimmy Aguisanda, hepe sa kapolisan sa Presinto 1 sa Mandaue City Police Office (MCPO) miila sa namatay nga mao si Jorenda Casul, 42 anyos ug ang grabeng naangol mao si Palconeri Abaya, pulos  manindahay og karne sa nahisgutang merkado.

Dugang pa ni Aguisanda nga 42 nga gidaghanon nga naangol  ang lima lamang niini nga naglakip sa usa nga namatay ang naggikan sa merkado publiko sa sitio Tribunal sa barangay Centro sa maong dakbayan.

Si Aguisanda miingon nga ilang gibutangan og police line ang palibot sa nahisgotang merkado publiko ug kini magpabilin hangtod nga ang mga engineers sa kagamhanan sa maong dakbayan modeklarar nga luwas kini sa mga tawo.

Matud pa niya nga si Casul ug Abaya maoy nakasinati og grabeng kadaut sa kalawasan human madat-ugi sa natagak nga decorative glass panels.

Si Roger Arnasto, 46 , nga taga barangay Ibabao sa maong dakbayan ug comfort  room collector sa merkado publiko sa maong dakbayan nga nahinabi sa Banat News miingon misuway siya og salbar sa duha nga nagrabehan.

Diha siya sa comfort room dihang nahitabo ang kalit nga pagtay-og ug sa iyang paggawas iyang nakita ang mga tawo nga nagdinaganay paingon sa gawas nga daw gibati og kahadlok nga maoy nakaaghat usab kaniya sa pagsunod kanila.

Matud pa niya nga naghuot ang mga tawo bisan sa kadako sa pultahan hangtud nga siya nakalusot ug sa iyang paglingi maoy iyang nakita sila si Casul nga natagakan sa glass panel. Si Konsehal Diosdado Suico nga naghimo og pakisusi sa palibot sa merkado miingon nga kinahanglan nga masusi sa mga engineers ang edipisyo.

Si Mosulini Suliva kinsa diha sa merkado atol sa pagkahitabo mibutyag nga nangliki ang pipila ka bahin sa merkado. (BANAT NEWS)