Polis gisumbag sa hubog

CEBU, Philippines - Nakalihay ang  usa ka polis nga  gisuwayan og sumbag  sa  usa  ka  hubog nga  ilang girespondihan didto  sa barangay Poblacion, lungsod  sa Alcantara  sa alas 8:00 sa miaging gabii. Ang maong hubog naila nga si Magdalino Nable, 39, lumolupyo sa barangay Poblacion sa maong lungsod.

Si SPO3 Zalde Orillo nga nahinabi sa Banat News miingon nga nakadawat og alarma ang kapolisan sa maong lungsod  bahin  sa  usa ka hubog nga nanghasi.

Busa mirespondi si SPO2 Meliton Agadier, PO2 Roselito Sevilla, PO1 Fortunato Mamac, PO1 Camilo Bayang sa maong alarma ug ilang nabantayan nga nag-wild si Nable.

Matud ni Orillo nga gitambagan ni SPO2 Agadier  si Nable nga  mokalma, apan gihagad  niini  og  sinumbagay si Agadier. Miingon si Orillo nga giingnan si Agadier ni Nable nga ipahubo ang iyang uniporme ug ibutang ang iyang pusil aron magsinumbagay sila.

Wala kaagwanta  ang  suspek  gisumbag niini   si Agadier apan tungod  kay  praktisado, abtik kaayo  milihay si Agadier  busa wala  maigo.

Diha-diha  gisignit  usab  dayon  sa   tulo ka laing polis si Nable. Ila  kining  gidala ngadto sa buhatan sa kapolisan sa Alcantara ug gitanggong dayon kini sa selda.  (BANAT NEWS)