Mananagat gitigbas angol sa silingan

CEBU, Philippines - Naangol ang usa ka mananagat nga natigbasan sa laing mananagat nga iyang silingan  didto sa sitio Panas sa barangay Guinsay sa dakbayan sa Danao alas 7:00 pasado ang takna sa miaging gabii.

Ang biktima mao si Emiliano Romo Alerta, 51 , minyo   ug  ang suspetsado nga nakatigbas kaniya mao si Jolito Batulan Roble, 57, minyo ug pulos nagpuyo sa maong dapit.

Si SPO2  Ildefonso Prosia sa kapolisan sa maong dakbayan nga maoy nakatubag sa maong alarma miingon nga nasuko ang suspetsado  ngadto sa biktima tungod   kay giingong  giguba  niini  ang  iyang  koral sa dagat   nga  panipong sa mga isda. Dihang  iyang  nasugatan  ang  biktima,   gilanit  sa suspetsado  ang  gitakin   niya  nga  sundang nga may gitas-ong 24 ka pulgada  ug gitigbas ang biktima sa makadaghang higayon.

Ang suspetsado nga nagkabuang og panagang nasamdan sa bukton ug abaga ug dali kining gihatod sa iyang mga sakop sa pamilya ngadto sa Danao Provincial Hospital.

Apan human sa paghatag og pasiunang tambal dali kining gibalhin ngadto sa Vicente Sotto Memorial Medical Center sa dakbayan sa Sugbo. Si SPO2 Prosia miingon nga ilang nadakpan ang suspetsado ug nasakmit usab nila ang sundang nga gigamit   sa pagpanigbas  niini  ngadto  sa biktima.

Sa pagkakaron  temporaryo nila  kining  gibalhog sa bilanggoan samtang gipaabot pa  ang biktima   kinsa  maoy    mopasaka og kaso batok niini. (/WC) (BANAT NEWS)