5 mil ka estudyante dunganon pagbakuna batok HPV

CEBU, Philippines - Sugdan  na sa  pagpatuman  sa kagamhanan  ang  dinungan  nga  pagpamakuna sa  lima ka libong kabataan  sa Metro Cebu areas  batok sa Human Papilloma Virus(HPV) sa katapusang  semana  niining  buwan  sa Septiyembre.

Mao  kini  gibutyag  ni Dr. Irma L. Asuncion sa pakighinabi  sa Banat News  kagahapon  human sa ceremonial  launching  niini  niadtong Martes  sa buntag didto  sa Don  Vicente Rama  Memorial Elementary School sa barangay  Basak, dakbayan  sa Sugbo.

Si Asuncion  miingon  nga  gipili  nila kining  mga  nanagtungha  nga  nagpangidaron  og  11 ngadto sa 14  nga  nagtungha  sa elementarya  aron  masanta  ang  mga  sakit  nga  cervical cancer  ug  uban  pa.

Miingon  siya  nga  kining  mga  pangidarona  maoy  tukma  kaayong  edad  sa bata  nga  angayang  bakunahan  niining  medisina  nga  mugna  ug  gipabrika  sa MSD.

Kini  tungod  kay wala  pa  kini  makatilaw  og  mga  butang  nga  sama  sa  mga  hamtong .

Gani  miingon  siya nga  suwerte  kaayo  ang  Sugbo  kay  maoy  unang  dakbayan  sa tibuok  nasud  nga  napili  sa MSD  nga  ipatuman  kining  maong  pamakuna  batok  sa HPV.

Miingon  siya nga dinhi  sa Sugbo  may 14 ka  mga  tunghaang  elementarya  nga  iya  sa goberno  ang  gipili  sa  National  Youth  Commission (NYC)  nga  maoy kahatagan  niining  maong  bakuna.

Si Asec Erwin Andaya  sa NYC  miingon  nga  sila  maoy  nagpili  sa  maong  mga  kabataan  aron  kabakunahan  niining  medisina  nga  batok  sa HPV.

Usa  sa hinungdan  nga ang  mga  kabataan  sa Sugbo  maoy  giuna,  tungod  sa kamahal  sa matag  dosage  ning  maong  tambal  nga  tag P4,000 kapin  ang  matag  usa.

Ang epekto  ning  maong tambal magpadayon  hangtud  sa hangtud, sumala  ni Dr. Asuncion. (BANAT NEWS)