Gipamusil usa patay

CEBU, Philippines - Usa ang patay samtang usa ang angol sa pagpamusil sa basketbolan sa sitio Lower Kawayan, barangay Sambag 2  sa alas 11:45 sa buntag kagahapong adlawa.

Patay diha-diha ang usa ka lalaki nga naila lamang sa alyas nga Sherwin o Bungot, hingkod ang panuigon lumulupyo sa barangay Ramos sa dakbayan sa Sugbo. Samtang naangol usab si Joselito Boot, 22, residente sa lugar.

Matud pa ni Boot nga nagduwa siya sa computer sa duol dihang may nadungog siya og pipila ka buto ug nakita na lamang niya nga natumba na si Sherwin. Nabatyagan na lang niyang naigo diay usab ang iyang walang tiil. 

Base sa pasiunang imbestigasyon nga gihimo sa Homicide Section nga ang barangay tanod nga si Librado Ansad nakadungog og nagsunod nga buto sa armas ug dunay nakit-ang usa ka lalaki nga nagkadugo ang tuong kamot nga nagdagan padung sa sudlonon nga bahin sa maong lugar.

Ang mirespondeng pulis pinangulohan ni SPO1 Victor Ruel Ayuman, PO1 Michael Angelo Singson ug PO1 John Erik Samosa uban sa mga elemento sa Crime Scene Investigation Unit miingon nga may lima ka samad pinusilan sa ulo si Sherwin ug patay na kini.

Nakuha duol sa patay nga lawas sa biktima ang lima ka kabhang, upat ka buhing bala ug duha ka deformed slug sa kalibre .45 nga bala ug usa ka wala mailhing slug nga gituohang gikan sa laing pusil.

Dunay pagduda nga armado usab ang biktima apan gikuha ang armas niini. Samtang si Boot gidala sa Vicente Sotto Memorial Medical Center.  (BANAT NEWS)