Negosyante’g karne gipahimangnoan pag-ihaw’g hayop sa balay illegal

CEBU, Philippines - Ang  mga negosyante og karne  ug litson nga baboy sa dakbayan sa Talisay gipahimangnoan sa siyudad nga  gidili  ang  backyard butchering o pag-ihaw og hayop sa   ilang balay.

Si Talisay City Legal Officer, Atty. Alfredo Sipalay mipadala og suwat ngadto sa tanang mga negosyante og karne nga  nagbutyag kalabot sa report nga iyang  nadawat bahin sa nahisgutang kalapasan sa mga negosyante.

Ang  gilapas  nila  mao  ang   Akta Republika numero 9296 kon “Meat Inspection Code of the Philippines”, matud  pa  ni Sipalay.

Si Sipalay nagkanayon  nga ang mga karneng wala ipaihaw  sa ihawan sa siyudad maisip   nga hot meat.

Ang siyudad  adunay katungod sa pagkompiska sa mga hot meat tungod kay delikado kini sa panglawas sa mga konsumedor.

Gipasabot usab ni Sipalay nga ang silot sa malapason  mao ang pagkapriso sulod sa unom ka tuig ug usa ka adlaw o dili molapas  sa 12 ka tuig o pabayaron og multa nga dili moubos ug dili molapas  sa P100,000.

Sa laing bahin, si Talisay City Veterinarian, Dr. Santiago Hortel nagkanayon  nga gitakda silang mopahigayon og  operasyon batok sa mga hot meat  sa mga merkado sa Talisay.

Matud ni Hortel nga human  kapadad-i og suwat sa city legal officer ang mga negosyante og karne misaka karon ang abot sa ihawan.

Gibutyag ni Hortel nga kaniadto sa weekend  adunay 200 ngadto sa 250 ka mga baboy ang maihaw apan karon moabot na kini  sa 300.

Sa  mga week days kaniadto 130 lang ka mga baboy ang maihaw ,apan karon misaka   na  gikan   sa 150 ngadto sa 160.

Ang ihawan maningil  og P200 nga bayad matag usa ka baboy nga ipaihaw.  (BANAT NEWS)