Gituohang giurom sa kabusog patay

CEBU, Philippines - Patay na nga namat-an sa iyang asawa ang  panday  niyang  bana nga gituohang giurom  didto sa barangay Cabcaban sa lungsod sa Barili kagahapon sa ala 1:26 sa kaadlawon.

Ang patay na nga gidala sa tambalanan mao si Romualdo Grado, 33, adunay kapuyo ug mga anak ug usa ka panday nga nagpuyo sa maong lugar.

Si PO1 Florentino Cuadero sa Barili Police Station mibutyag  sa  Banat News   nga  segun  sa nasayran  nila  kang  Loreta Bajenting, hingkod,  nga  kapuyo ni Grado nga  human sa ilang panihapon  nanan-aw og salida sa telebisyon.

Apan  matud  pa ni Bajenting   nga  nahibulong  siya kay  samtang  nagtan-aw  sila  sa salida  sa TV, nagpunay  og  pasalamat  kaniya  si Grado  tungod   sa kabusog   niini  sa  ilang  panihapon.

Nianang mga alas 10:00 sa gabii nangatulog sila ug paglabay sa pipila ka oras namatikdan niya nga nagsigi og  yawyaw  si Grado samtang nahinanok sa pagkatulog.

Apan dihang iyahang  gipukaw nianang pagkakaadlawon namatikdan niya nga namugnaw  na  ang  mga  kamot  niini  ug dili na motubag bisan   giunsa nila og pukaw. Busa  nanangpit  si  Bajenting  sa ilang  silingan ug    nangayo og panabang sa kapolisan. Gisuwayan unta nila kini  paghatud  ngadto  sa Barili District Hospital apan gideklarar sa mga doctor nga dead on arrival (DOA).

Gituohang sa mga doctor nga giurom  si Grado samtang  natulog    nga  maoy usa sa nakaingon sa iyang kamatayon. (BANAT NEWS)