Libreng Tawag sa telepono gimontar sa Globe

CEBU, Philippines - Gimontar  sa Globe Telecom ang duha ka Libreng Tawag  center nga  katawgan  sa  mga  biktima  ug  sa ilang  mga  pamilya sa  nalunod   nga  barko  sukad niadtong  Biyernes  sa gabii. Si Fernando Esguera, OIC  sa Globe Corporate Social Responsibility nagkanayon  nga  ang  pagmontar  sa  Libreng  Tawag  sa  ilang  kompaniya  gihimo  human  sa pagkalunod  sa  barko nga  MV St. Thomas  Aquinas didto  sa kadagatan  sa dakbayan  sa Talisay  niadtong  Biyernes  sa gabii.

Matud  pa  ni  Esguera  nga ang  unang  lugar  sa  Libreng Tawag  mao  ang   Pier 4 Terminal   sa  Port Area  nga  nahimutangan  sa    dul-ang   300  ka  mga  survivor  sa maong  higayon.

Samtang  ang  ikaduha  nga LibrengTawag center mao  ang  didto sa  Sugbutel,  usa  sa  duha  ka  mga  lugar  nga  gipapahuwayan  sa  mga  survivor.

Midugang  siya  nga gihatag  nga  libre  ug  walay  bayad  ang  paggamit  sa telepono sa Globe alang  sa  mga  tawag  dinhi  sa  Sugbo,  sa tibuok  nasud  ug  sa  gawas.

Matud  pa  ni  Esguera nga ang  Libreng Tawag magpadayon  hangtud  nga masulbad  ug   wala  nay  mga  biktima  o  kaha  sakop  sa ilang  pamilya  ang  manginahanglan  niini.

 Si  Esguera  miingon  nga  gihatag  sa Globe  Telecom  ang  Libreng  Tawag  sa pagtuo  nila  nga  dako  kini  og  ikatabang  alang  sa  mga  nabiktima  o  kaha  minahal  nila sa kinabuhi  nga  nagsalimuang  pagpangita  og  sulbad  sa ilang  suliran.

Wala’y  kuwarta ug  wala’y  cell phone  ug  wala  nay  laing  mahimo  gawas  sa pangaliya  nga  unta  may  motabang  kanila.

Gumikan  niini  ang  maong Libreng  Tawag  gihalad  sa Globe  Telecom  sa mga  pasahero  ug  tripulante    nga  nabiktima  sa pagkalunod  ang M/V St. Thomas Aquinas 1 sa 2Go Shipping Lines human  dasmagi  sa M/V Sulcon Express 7  nga  gipanag-iya  sa   PSACC (kanhi Sulpicio Lines), alas 9:03  sa gabii  didto  sa kadagatan  sa  Lawis Ledge sa dakbayan  sa Talisay, Cebu.

Sa pagkakaron  padayon  pa  ang  rescue operation  sa  Coast Guard  ug sa  mga  miboluntaryo  nga  mga  diver. (BANAT NEWS)