Vendor og RTW gipusil patay

CEBU, Philippines - Namatay ang usa ka 35-anyos nga vendor sa Tabunok human kini pusila sa duha ka wala hiilhing lalaki   didto sa sitio Kasagingan, barangay Lawaan III, dakbayan sa Talisay, kagahapon  sa kaadlawon.

Ang biktima mao si Rey Mamalias Gallos, taga sitio Selma Crusher, Lawaan III, sa maong  dakbayan. Naigo  kini  sa ulo  ug  daling gidala ngadto sa Talisay City District Hospital apan patay na kining naabot sa maong tambalanan.

Sila si SPO1 Mikie Espina, PO1 Stephen Sefuesca ug PO1 Edwin Campomanes   maoy daling miresponde sa maong insidente.

Sa imbestigasyon sa kapolisan   nasuta  nga ang biktima gikan   nga naninda  sa Tabunok uban sa iyang asawa   nga  nagsakay sa ilang motorsiklo paingon   sa ilang  balay. Ang duha ka wala  hiilhing  lalaki kinsa pulos   nagsul-ob og helmet  nagsakay   usab og  motorsiklo nga nagsunod  sa biktima.

Dayon  ang  angkas  niini  maoy  miluthang  sa biktima,  busa  nahagbong si  Gallos  gikan sa motorsiklo human maigo sa ulo. Dali kaayong  miikyas  ang  mga  kriminal  gikan  sa maong  dapit.

Si Espina nga nahinabi sa Banat News kagahapon mibutyag nga bahin sa bangi sa negosyo ang gilantaw nila  nga hinungdan sa insidente.

Matud ni Espina nga si Gallos manindahay  og mga sapatos ug RTW matag gabii  sa parking area sa merkado sa Tabunok. Giingong si Gallos  adunay nakalalis nga laing mga manindahay  bahin sa ilang pwesto niadtong Huwebes sa gabii ug nianang Biyernes sa kaadlawon siya  gipatay.

Si Espina midugang nga nagpahigayon pa sila og follow-up nga imbestigasyon sa maong insidente. (/WC) (BANAT NEWS)