‘Pusher’ gipusil patay
CEBU, Philippines - Gipusil patay sa wala pa matumbok nga mamumuno ang usa ka 29- anyos nga lalaki nga gituohang nalambigit sa negosyo sa illegal nga drugas diha sa Sityo Lower Sun-ok sa barangay Ibabaw sa lungsod sa Cordova sa miaging gabii.
Ang biktima mao si Joseph Dizon alyas Waray, 29, lumad nga taga Eastern Samar ug nagpuyo sa maong lugar.
Matud ni SPO3 Roel Dinoy sa operations branch sa Cebu Police Provincial Office ang biktima naglakaw sa maong lugar dihang kini gipusil sa wala pa mailhing mga mamumuno.
Ang mga silingan igo lang nakadungog og butobuto sa armas ug sa ilang pagsusi nagbuy-od na ang biktima ug dunay pinusilan sa bukobuko ug patay na.
Ang mga mirespondeng mga polis sa crime scene naka recover og usa ka kabhang sa bala sa kalibre .45 ug cellphone nga gipanag-iya sa biktima.
Upat ka sachet nga dunay sud nga gituohang shabu gisud sa pitaka sa biktima ang nakit-an sa mga imbestigador maong nagduda karon ang kapolisan nga posibleng may kalambigitan sa illegal drugs ang motibo sa maong pagpatay.
- Latest
