Magtiayon naugdaw

CEBU, Philippines - Nangapaig  sa  kayo  ang magtiayon  kinsa  napakyas  sa pag-ikyas  sa  kayo  nga  miugdaw  sa ilang  balay   sa sitio Sto. Niño, A. Lopez,  barangay Labangon, pasado ala l:00 kagahapon sa kaadlawon.

Ang mga nasunog mao sila  si  Margarita, 58 ug Edgardo Miego, 60. Pasado ala 1:00  sa kaadlawon nadawat  sa kabomberohan  ang alarma sa sunog  ug nakontrolar kini sulod sa 58 minutos,  nga   gibutang   sa kabomberohan sa 3rd  alarm.

Sa pakighinabi sa mga  tigbalita  kang Elsa Giango, igsoon  ni  Margarita, kini  miingon  nga ang kauban sa iyang maguwang ug sa iyang bayaw mao ang anak niining minyo ug pag-umangkon nga dali usab nga nakalingkawas gikan sa bangis nga kalayo.

Giingong tungod sa wire, miulbo ang dakong  sunog nga gikatahong nagsugod sa ikaduhang andana sa panimalay sa pamilyang Miego.

Matud pa ni Giango nga   nasuta  nila  nga posibling naglisod na sa pag-abli ang magtiayon sa doorlock sa ilang  balay tungod kay gi-double lock man kini.

Dugang pa ni Giango nga posibli usab nga naabtan sa kayo ang magtiayon tungod  kay paralisado man ang iyang bayaw ug maglisod kini sa paglakaw.

Samtang usa sa mga residenti nga nasunogan   usab  nga si Lanie Angeles, mihulagway nga nakadungog  siya og siyagit nga sunog, hinungdan nga iya kini nga gisusi sa  gawas.

Apan nakugang na lang   siya  dihang iyang nakita ang dakong kayo nga milamoy na sa  balay sa pamilyang Miego.

Gani, hilabihan  kabalaka ang gibati ni Angeles tungod kay ang ilang nadala, mao lamang ang gamay’ng gamit ug pipila ka school supplies sa iyang tulo ka anak.

Matud pa ni Angeles nga naproblema siya tungod kay ang tulo niya ka anak nga unipormi wala nila madala nga posibling nasunog usab.

Si Cebu City Fire Marshall William Tacaldo, mipadayag  nga ila pang sutaon ang tanang impormasyon nga ilang nadawat kalabot sa hinungdan sa maong sunog.

Matud pa ni Tacaldo, tungod sa kahagip-ot sa lugar naglisud sila sa pagsulod  niini  ug  ila  na lang  gisumpay- sumpay ang mga hose aron  makaabot sa fire scene.

Usa  sa ilang  problema mao  nga dead-end ang  lugar   ug  naglisud  sila  pagkontrolar  sa kayo, sumala  ni  Tacaldo.

Gibana-banang mokabat sa P800 mil  ang danyos sa maong sunog diin, 21 ka panimalay ang hingpit nga na-ugdaw, samtang laing duha   ang  igo  lang gipahakan  sa kayo. Gihulagway sa kabomberohan nga ginama sa mix materials ang mga panimalay sa maong dapit.

Samtang ang kapitan sa barangay Labangon Vic Buendia, mipadayag usab nga kasamtangan una niyang ipahimutang sa ilang gym ang mga apektadong residenti. (BANAT NEWS)