Mga sinakong basura

CEBU, Philippines - Kapolisan sa dakbayan sa Talisay nakahipos og sinakong mga basura sa ilang gipahigayong coastal cleanup diha sa kabaybayonan sa barangay Poblacion ug lakip na sa ilawom sa kadagatan sa Lagundi Reef sa maong barangay.

Ang maong kalihukan gipahigayon niadtong Domingo sa buntag kinsa katambayayong sa kapolisan sa pagpanglimpiyo ang Talisay City Aquanauts nga usa ka non-government organization ug ang mga lifeguard sa siyudad.

Ang kagamhanan sa siyudad maoy mihatag og pagkaon sa mga nagpahigayon sa coastal cleanup.

Si Inspector Margienett Yosores kinsa usa sa misawom diha sa Lagundi Reef nagkanayon nga ang maong kalihukan tinuig kini isip usab sa pagsaulog sa international ocean month sa buwan sa Mayo.

Apan matud ni Yosores nga bisan og dili buwan sa Mayo magpahigayon gyud sila og coastal cleanup aron sa pagpakita sa katawhan sa pagpreserba sa kalikupan nga dili sila magpataka og labay sa ilang mga basura.

Gibutyag ni Yosores nga mikabat sa siyam ka sakong basura ang ilang natigom sa ilang pagpanglimpiyo diin ang unom ka sako sa maong mga basura  nakuha nila kini gikan sa Lagundi Reef.

Ang mga nakuhang basura sa Lagundi mga pukot nga nasangit diha sa bato ilawom sa dagat, mga sanitary napkin, diaper, plastik nga putos sa kape ug shampoo.

Giingong dunay mga nagpuyo diha sa daplin sa baybayon nga ang ilang mga basura ilubong diha sa balas diin anuron kini sa bawod.

Ang maong mga basura makadaot kini sa mga gasang ug ingon man sa ubang mga marine life diha sa ilawom sa dagat. Ang mga gasang mao kini puy-anan sa mga isda.

Giangkon ni Yosores nga ang pagpanglimpiyo diha sa kabaybayonan ug ilawom sa dagat usa ka dakung tahas ug nagkinahanglan usab sila niini og tabang sa katawhan.

Si Yosores nanawagan sa katawhan nga unta magbaton kini og disiplina nga dili magpataka og labay sa ilang mga basura.

Sa laing bahin, kahinumduman nga pipila na katuig ang nakalabay human masangad diha sa Lagundi Reef ang M/V Majuro nga usa ka cargo vessel maayong pagkaguba sa mga gasang nga naigo sa propeller sa maong barko.

Si Yosores nagkanayon nga nabantayan nila nga ang mga gasang nga gitanom puli sa mga gasang nga nangaguba mitubo na kini. (BANAT NEWS)