Mipusil ni Go pasakaa’g kaso karon

CEBU, Philippines - Gikatakdang pasakaan og kasong frustrated murder ug kalapasan sa Comelec gun ban karong adlawa (Lunes) diha sa piskaliya sa dakbayan sa Talisay ang usa ka retiradong polis kinsa nakapusil sa usa ka kanhi konsehal sa siyudad.

Ang Comelec gun ban malibkas kini karon pang Hunyo 30, 2013. Kahinumduman nga base sa imbestigasyon sa kapolisan si kanhi Konsehal Emilio Go ug retired SPO3 Ulysis Desamparado ang giingong nagkapinusilay niadtong Sabado sa hapon tungod sa tigbakay diha sa ilang lugar sa Friendly Homes Subdivision, barangay Bulacao, Talisay. Sa maong pinusilay si Go nakaangkon kini og samad pinusilan sa li-og, tiyan ug nawong. Gawas kang Go si Junrey Larayos naigo usab sa maong pinusilay ug nakaangkon kini og samad pinusilan sa tiyan.

Si SPO1 Mikie Espina nga nahinabi sa Banat News kagahapon nagkanayon kini nga sa ilang imbestigasyon si Ulysis nangangkong si Go maoy nakapusil kang Larayos. Giingong si Larayos handler kini sa mga manok ni Go.

Giingong si Ulysis diha sa likod ni Larayos dihang nagkapinusilay sila ni Go.

Kahinumduman usab nga niadtong Sabado ang manok ni Go ug manok sa manghud ni Ulysis nga si Buenafe Desamparado maoy nagsabong diin ang koyme mideklara nga ang manok ni Buenafe maoy nakadaog. Apan ang duha ka mga manok pareho kining namatay hinungdan nga ang mga supporter ni Go nagkanayon kining “tabla” o walay midaog.

Isip rule sa buwang ang bihag maiyaha kini sa gideklara nga nakadaog apan giingong wala ihatag sa kampo ni Go ang bihag ngadto sa kampo sa mga Desamparado lakip na ang P12, 600 nga pusta. Sa maong sitwasyon si Go ug Ulysis nag-istoryahanay kini. Sa ulahing imbestigasyon sa mga polis giingong si Go ug Ulysis nagkasabot na unta kining “tabla” lang ang ilang mga manok o walay midaog kanila apan giingong usa ka tawo nga giingong supporter ni Go ang kalit misukmag kang Buenafe hinungdan nga miulbo ang kagubot ug misangpot sa pinusilay ni Go ug Ulysis.

Giingong ang pistola ni Ulysis niadtong higayona duna lang kini lima ka mga bala ug ang usa ka bala mikagar hinungdan nga miatras na siya sa maong pinusilay.

Si Go ug Junrey kinsa parehong samaron niadtong higayona daling gidala ngadto sa lain-laing tambalanan.

Matud ni Espina nga huwaton nilang makasulti na si Go ug Larayos aron makuhaan usab kini sa ilang mga habig.

Ang mga paryente ni Go ang dili mohatag og pamahayag sa mga polis tungod kay wala kini kalibutan sa maong hitabo.

Niadtong Sabado sa hapon matud ni Espina si Go naa kini sa Intensive Care Unit (ICU) sa Chong Hua hospital samtang si Larayos nga gidid-an pa usab nga makasulti sa iyang doktor sa Vicente Sotto Memorial Medical Center. (BANAT NEWS)