Turista nagdunggab sa dughan

CEBU, Philippines - Usa ka Polish ang napalgang patay atubangan sa payag sa iyang gipuy-an kagahapon pasado alas-6 sa buntag sa Satellite Market, diha sa Sitio Tingtingon, Brgy. Marikaban lungsod sa Santa Fe.

Ang langyaw giila nga si Martin Mateuszczyk, 39, kinsa napalgang adunay linaslasan sa iyang pulso ug nagtaop pa ang usa ka kutsilyo diha sa iyang dughan. Sumala pa ni PO1 Jumary Villaceran sa Santa Fe police station, base sa ilang nadawat nga report namatyan og anak ang maong langyaw.

“Matud sa iyang mga kaila, five days na nagsige og inom ang biktima kay tungod sa pagkamatay sa iyang anak nga 4-anyos nga naligsan sa Poland,” matud pang Villaceran.

Kagahapon nagpalit si Mateuszczyk og usa ka botelyang beer sa tindahan sa iyang gipuy- an nga gipanag-iya ni Filomino Espliguera nga iyaha usab nasuod ug nahimong higala.

Matud pa nga milakaw nianang pagkagabii si Espliguera aron motambong sa usa ka party ug nabilin si Mateuszczyk sa maong balay.

Buntag na nabalik si Espliguera ug nakugang nalang siya sa iyang naabtan tungod kay naghigda na sa gawas sa giabangang balay ang higalang langyaw nga nagkadugo ug may nagtaroy nga kutsilyo sa iyang dughan. Nasuta usab nga dunay samad sa liog si Mateuszczyk.

Usa ka botelya sa beer, usa ka dakong kutsilyo nga nagtaop sa dughan sa langyaw ug usa ka laing gamay nga kutsilyo ang nakita diha sa crime scene.  Nagduda ang kapolisan nga naghikog gyud si Mateuszczyk tungod kay wala’y timailhang may nahitabong komosyon sa crime scene.

Matud pa nga sugod niadtong nadawat ni Mateuszczyk ang balita sa gidangatan sa iyang anak, nagpunay na kini og hubog-hubog ug dunay usa ka higayon nga nangutana pa kini sa mga higala samtang nagkupot og sanggot kung makapatay ba gyud kini. "Iyang gisuway og abis-abis sa iyang tiyan ug hait ba gyud pero gipaagi la'g binuang," matud pang Villaceran.

Dugang kasayoran nga nahipos sa Banat News nga buwan pa sa Disyembre naabot sa lugar si Mateuszczyk ug nagpa-extend sa iyang pagpuyo hangtud sa Hunyo 13 ning tuiga.

Sumala pa nga giganahan kini dinhi sa Sugbu nangunsulta kung unsaon mamahimong permanenteng residente sa Pilipinas.  Ang kapolisan mitawag na Department of Foreign Affairs aron magpatabang sa paghipos sa patay’ng lawas niini. (/EIM)(BANAT NEWS)