Motorsiklo nabag-iran sa armored van 4 angol

CEBU, Philippines - Upat  ka  tawo  ang naangol  human  masaghiri  sa usa  ka armored van ang motorsiklo   nga  ilang giluwanan   sa dalan M.L. Quezon sa barangay Pusok , dakbayan sa Lapulapu sa  miaging  adlaw.

Si PO3 Renato Llanes sa traffic division sa Lapulapu City Police Office (LLCPO) nga nahinabi sa Banat News miila sa mga biktima nga mao sila si Dino Etcobanez, 32 , nga taga sitio Ibabao sa barangay Agus sa maong dakbayan ug duha ka mga anak niyang babaye ug inahan niini nga si Remedios.

Matud pa ni PO3 Llanes nga nagdagan paingon sa barangay Poblacion sa maong dakbayan ang motorsiklo dihang        ang amored van sa Armortech International Transport    nga gimaneho sa security guard nga driver  usab  nga si Joseph Pendoy, 32 ,  taga Sto. Tomas Village sa barangay Poblacion sa dakbayan sa Danao,  nga nagsunod sa  maong motorsiklo  mi-overtake  ug nabag-iran  ang nahisgutang  motor.

Gumikan   niini  nawad-an  sa  panimbang  si Etcobanez  sa iyang  motor  nga  misangpot  sa pagkasaliring  niini  ug nalamba s a sementadong  karsada  sa maong  dapit.

Ang  mga  nagsakay  sa motorsiklo  nag-iyahay sa  pagpangalagpot    ug  pulos  mitugpa   sa sementadong  karsada.

Dali nga gidala sa mga sakop sa Emergency Rescue Unit Foundation ang mga biktima ngadto sa Mactan Doctors’ Hospital ug  ang drayber nga si Pendoy  mitahan usab  dayon  ngadto   sa kapolisan ug  temporaryo nga gitanggong sa  ilang  detention  cell samtang  gipaabot  ang  kiha  nga  ipasaka  sa  mga  biktima. (BANAT NEWS)