Lalaking nag-BMW girakrakan diha sa karaang Whitegold
CEBU, Philippines - Usa ka lalaki ang nalandig sa tambalanan human gipusil sa wala pa mailhing mga tawo samtang kini sakay sa iyang awto diha sa may karaang Whitegold sa North Reclamation Area sa dakbayan sa Sugbo kagahapon sa hapon.
Ang biktima giila sa Homicide Section nga mao si Edgar Lim, taga Mango Avenue luwan sa usa ka BMW nga puting awto. Samtang padayon pa ang kapolisan pagtino sa mga gikatahapan.
Matud pa ni PO2 Nilo Adventurado sa Homicide Section padayon pa silang nanguha og impormasyon gikan sa asawa ni Lim. Si Lim gidala sa usa ka pribadong tambalanan tungod sa samad pinusilan sa tiyan.
Base sa pasiunang report, gisundan nang daan ang biktima diha pa lang sa tunnel sa South Road Properties ug pag-abot sa nahitaboan kalit kining gipaulanan og bala.
Usa ka manok igtatari ang na-recover sa mga polis gikan sa sakyanan sa biktima. Ang kapolisan padayon pa sa pagtino sa motibo sa maong krimen. (BANAT NEWS)
- Latest
