Balay sa retired US Navy girapido
CEBU, Philippines - Natusaktusak sa bala ang pinuy-anan sa usa ka retired U.S. Navy nga kontraktor na karon sa Tsuneishi Heavy Industries sa Balamban human girapido sa tulo ka mga armadong lalaki kagahapon sa kaadlawon didto sa barangay Arpili sa Barili.
Ang biktima nga si Claudio Ulbenario, 61, swerteng nakahapa sulod sa balay ug wala maigo sa nagpungasi nga mga bala.
Tulo ka mga lalaki nga nagsuot og ski mask ang responsable sa maong pagpangrapido.
Matod ni SPO1 Juluis Obanana, desk officer sa Barili Police Station dihang nahinabi sa Banat News nag- inusara sa pinuy-anan ang biktima nga nagtan-aw og salida sa telebisyon dihang kalit nga girakrakan ang iyang balay.
Gisusi pa sa kapolisan kung si kinsa ang mga gikatahapan ug kung unsay motibo niini.
Nakuha sa kapolisan diha sa crime scene ang siyam ka basiyo sa bala sa kalibre .45 ug ang tanod nga si Cepriano Biasong naka-recover sab sa dalan og bala ingon man usa ka magazine sa susamang kalibre.
Ang biktima aduna nay gidudahang utok sa maong pagpangrapido ug nanugo ra kini og guns for hire. Gisubay usab sa kapolisan ang background sa trabaho ni Ulbenario nga posibleng aduna kini gipanaktak sa trabaho. (BANAT NEWS)
- Latest
