Laptop sa estudyante gisakiyo sa Salisi Gang

CEBU, Philippines - Nasakiyo  sa   tulo  ka wala  hiilhing  kawatan  kinsa  giingong  sakop  sa Salisi Gang  ang  laptop  sa  usa  ka  estudyante  sulod  sa  usa ka kan-anan  sa dakbayan  sa Mandaue  sa miaging  adlaw.

Ang  biktima   mao si Maria  Isabel, 20, dalaga, lumad  nga  taga Cotabato  City  apan  temporaryong  nagpuyo  sa North Reclamation  Area  sa Mandaue.

Ang  biktima  kinsa  nagtungha  sa   Cebu Doctors’ University (CDU) mibutyag  sa kapolisan  sa dakbayan  sa Mandaue  nga  misulod  siya  sa usa  ka fast food  uban sa iyang  higala ug  gibilin  niya  ang  iyang  bag  nga  gisudlan  sa laptop  nga nagkantidad  og P18, 000 sa  lingkoranan  samtang  nag-order  sila  og  pagkaon.

Apan sa dihang nahibalik na sila sa lingkoranan, nabantayan sa biktima nga wala na sulod sa iyang bag ang laptop.

Dali niining gipahibawo ang tagdumala sa   maong kan-anan  ug dihang  gipasalida  niini  ang recorded video gikan sa CCTV Camera  nakita  ang  tulo  ka  wala  hiilhing  lalaki  nga  miduol  sa lingkoranan  nga  nahimutangan  sa laptop  sa biktima  samtang  nag-order  kini og  pagkaon   ug  dayon  gikuha  ang  laptop  ug  nagdali  nga  nanglayas  gikan  sa maong  kan-anan.

Gitaho  dayon  sa biktima  ngadto  sa kapolisan  ang  maong  hitabo  ug  didto  niya  hisayri  nga  ang  mikawat  sa iyang  laptop  mga sakop  sa Salisi Gang.

Si PO3 Roberto Neri  kinsa  maoy  gisumbongan  sa biktima nagkanayon   nga padayon   pa  nilang  gipangita  ang  maong  mga kawatan.  (BANAT NEWS)