Amo pugson helper ipamembro sa Pag-ibig
CEBU, Philippines - Ang Kasambahay Bill nakahasol sa mga employer tungod kay mapugos sila sa pagpa-membro sa ilang mga katabang sa Pag-Ibig Fund.
Matud pa ni Vice Presidente Victoria de la Peña, sa Pag-Ibig Visayas nga kini usa ka pagsulay alang sa mga employer kon amo nga dili nila kabalibaran tungod kay balaod na kini.
Dugang pa ni dela Peña nga ila na nga gihinayhinayan karon ang pagsuta sa mga panimalay nga may mga katabang ug sa pagpaniid kun tumanon ba sa mga employer ang gilagda sa Kasambahay bill.
Matud pa ni dela Peña nga kumo balaod na, dili na unta kinahanglang magpaabot pa ang mga amo nga sungkuon sila sa taga Pag-Ibig aron irehistro ang ilang mga katabang sa balay.
Matud pa niya nga tungod kay balaod na kini, pilit na nga motuman ang mga amo kay ilang katungdanan ang pagtuman sa balaod.
Gawas sa mga tagsa-tagsa ka panimalay, si dela Peña nagkanayon nga giduol usab nila ang mga opisyal sa Homeowners Associations aron mapahibalo ang mga employer sa ilang responsibilidad.
Samtang si dela Peña miingon nga dili lamang ang mga katabang ang gimanduan nga magpamembro na sa Pag-Ibig kundi lakip na usab ang mga drayber sa tricycle ug usab mga market vendor.
Gitug-an ni De la Peña nga ang pagkolekta sa premium sa mga drayber ug mga vendors maoy usa sa gitun-an karon sa Pag-ibig board. (/WC) (BANAT NEWS)
- Latest
