Way Santos nga Misa sa mga parokya sa Sugbo tungod sa National Thanksgiving Mass karon

CEBU, Philippines -  Mokabat sa singkwentay tres ka obispo ug 700 ka mga pari gikan sa nagkadaiyang artsidiyosisi sa nasud ang gipaabot nga motambong sa National Thanksgiving Mass ni San Pedro Calungsod diha sa South Road Properties karong adlawa.

Kagahapon gipahimutang na ang dose mil ka mga mono-block chairs alang sa mga pinasidunggang dinapit. Apan namatikdan nga walay bangko alang sa mga debotos nga gipaabot nga moabot sa usa ka milyon ang motambong.

Sugod karong alas-8 sa buntag walay Santos nga Misa nga himuon sa tanang mga parokya sa Sugbo gumikan kay gipanglantawang ang tanang kaparian manambong gyud sa selebrasyon.Gawas sa templete nga nakompleto na, na-consecrated na usab ang gitukod nga San Pedro Calungsod Chapel duol sa templete nga ginama sa talagsaong architectural design gamit ang 100 ka mga bungbong.

Ang 27-ektaryang luna sa SRP gipamutangan na usab og mga portalletes gikan sa siyudad sa Sugbo ug gidugangan og mga gipanghimong mga kasilyas aron dunay magamit ang mga debotos. Ipakatap usab ang dul-an napulo ka mga fire trucks sa palibot sa SRP inubanan sa nagkadaiyang mga emergency medical services volunteers nga moabag sa mga tawong adunay kakulian sa panglawas nga masinati.

Kagabii pormal nga gisugdan sa kapolisan ug kasundaluhan ang ilang security clearing operation sa tibuok SRP aron pagsigurong walay mga tawong magpundo diha sa sulod nga walay pagtugot. Bugtong mga sakyanang adunay gate passes lamang ang gitugotan sa simbahan nga makasulod ug gawas sa maong venue.

Si Fr. Raul Gallego, chairman sa committee on venue mipasalig nga mahingpit ang preparasyon kagabii pa lamang.

Gumikan sa napanglantawang kakulang unya sa lingkuranan giawhag ang mga debotos sa pagdala og kaugalingong mga bangko samtang lakip sa pahinumdom nga angayang dad-on mao ang tubig, pagkaon ug tambal sa dunay gi-mentinar nga medikasyon.  (BANAT NEWS)