Piniriso sa Medellin mipuga

CEBU, Philippines -  Usa ka piniriso sa Bureau of Jail Management and Penology (BJMP) sa lungsod sa Medellin  nakaeskapo niadtong  Lunes sa gabii.

Ang gipangita  pa  karon  sa  kapolisan mao si Pedro Canales, 43, taga barangay Tominhao, lungsod  sa Daanbantayan.

Si   Canales  giingong gisugo   ni Jail Officer Richie Alfornon sa pagpaayo sa iyang motorsiklo didto  sa Barangay Caputatan Sur, Medellin.

Apan  matud  pa sa pagsakay  niini  sa maong  motorsiklo  nga Honda  nga may plakang YM8803, mipasutoy  kini  og  padagan ug  wala  na gyud  mobalik.

Busa  gigukod kini ni Alfornon  apan  nalamba  ang maong  polis  sa karsada  kay  nadagma.

Nagpakitabang kini  sa iyang  mga  kauban kinsa  milihok  usab  dayon  sa paggukod  kang Canales apan  wala na  kini  hiapsi.

Matud ni Sr. Insp. Noel Ybarsabal, jail warden sa BJMP, nga na-recover nila ang motorsiklo ni Alfornon  niadtong Martes sa udto  didto sa Barangay Malingin, Daanbantayan.

Si Ybarsabal mibutyag nga didto  ra  sa  gawas sa detention cell nag-ayo sa motorsiklo si Canales nga gibantayan  usab  ni Alfornon. Apan sa dihang gi-testingan na niini sa pagpaandar sa maong  sakyanan, gisakyan kini  ug dayon  misirit  sa pagpadagan pahilayo  sa maong  lugar.

Si Canales  nag-atubang sa  kasong kalapasan sa Section 5 sa RA 9165 .

Nasikop kini sa kapolisan sa Daanbantayan ug gi-turn-over  ngadto   sa BJMP niadtong Oktobre 31.

Ang BJMP-Medellin nakig-alayon na karon sa kapolisan sa Medellin, Daanbantayan, San Remigio, ug Bogo City.

Ang BJMP regional office mipahigayon na usab og imbestigasyon sa maong hitabo apil na ang posible nga pagpasaka og kasong administratiba batok kang Alfornon.

Niadtong Sabado, si Jenard Pacquiao Magpuyo, 25, taga-Barangay Daan Lungsod, ug si Danilo Sanchez Navarro, 51, taga-Barangay 5, pulos  sa lungsod  sa Tuburan, miikyas usab  gikan  sa Tuburan detention cell dihang gibiyaan  kini  sa  jailer-on-duty nga si PO2 Jezrel Perigo. (Ria Mae Y. Booc sa The Freeman/WC) (BANAT NEWS)