Asturias misaulog sa Sr. Citizens week

CEBU, Philippines - Ang lungsod sa Asturias sa amihanang kasadpang bahin sa Sugbo misaulog sa Oktubre 1 hangtod 7 ning tuiga isip Senior Citizens Week uban sa mga pasundayag sa mga sakop sa Municipal Federation of Senior Citizen Associations of the Philippines-Asturias Chapter.

Matud pa ni Poblacion Asturias Federation Chapter President Eddie Montebon nga karong tuiga lamang nila nadesisyonan ang pagpahigayon og inadlaw nga aktibidad agi og pagtamud sa tibuok semana nga selebrasyon.

Samtang si Asturias Municipal Information Officer Mark Supatan mibutyag usab nga usa kini ka tinuig nga aktibidad alang sa tanang senior citizen nga gisalmotan sa dul-an sa 500 ka edaran na nga naggikan sa tanang barangay sa maong lungsod.

Ang tanang aktibidad nga gipahigayon karong tuiga gitumong sa pagpalig-on ug pagpadasig sa mga edaran na, sama sa pagbisita sa mga masakitong membro, pagduaw sa mga naprisong membro, pagtukod og mga proyekto sama sa gardening ug tree planting, chapter fellowship ug usab pagtuman sa obligasyon niini sa adlaw’ng Domingo.

Gidayeg ni Asturias Mayor Alan Adlawan ang tanang senior citizen atol sa iyang pagpamulong diin iyang gisaad nga ang konseho mohatag sa tibuok nga suporta niini sa tanang aktibidad sa maong grupo.

Gibutyag ni Supatan nga ang municipal government sa Asturias adunay program agenda alang sa mga senior citizen nga nagtumong sa pagpausbaw sa tanang kaayohan sa maong sector.

Gipahayag ni Supatan nga mahimo nilang magamit nga libre ang tanang ekipo nga gipanag-iya sa lungsod sama sa gym diin sila mopahigayon og mga lektura ug mga seminar agi og pagdugang sa ilang kaalam luyo sa pangidaron nila isip senior citizen. (/WC) (BANAT NEWS)