Bisan mi-file og COC:Jakosalem magpabilin sa CITOM?

CEBU, Philippines - Duna karoy mga pangutana kung si City Traffic Operations Management (CITOM) chairman Sylvan “Jack” Jakosalem kinsa midagan pag-usab sa pagka-konsehal sa siyudad sa Sugbo magpabilin pa ba sa maong buhatan human siya maka-file og certificate of candidacy.

Hinuon si Jakosalem nagkanayon nga gipahibalo na siya ni Cebu City Election Officer Edwin Cadungog nga wala na kinahanglana pang mo-resign siya sa iyang pwesto bisan naka-file na siya og kandidatura ilawom sa tiket sa Team Rama.

Nag-amping hinuon si Mayor Michael Rama ang pangulo sa Team Rama pinaagi sa pagdangop sa mga abogado sa siyudad aron matun-an og maayo ang balaod bahin niini kung mahimo bang ang mga opisyal nga naghupot og susamang posisyon kinahanglan bang mobiya niini aron makapangita na siya og laing ikahulip ni Jakosalem.

Si Cebu City north district Election Officer Marchel Sarno hinuon misanong sa pamahayag ni Cadungog sanglit si Jakosalem usa lang ka contractual employee sa Cebu City government ug dili appointed employee, maong wala na kinahanglanang mobiya siya sa maong pwesto.

Base sa labing uwahing Comelec En Banc resolution, ang mga appointed officials ug kawani sa gobiyerno lakip na ang kapolisan, sundalo gikunsiderar nga ipso facto o awtomatikong mo-resign sa ilang mga posisyon human sila maka-file sa ilang mga certificates of candidacy alang sa Mayo 13, 2013 nga eleksyon.

Apan bisan pa man duha na ka election officers ang miingon nga mahimong makapadayon si Jakosalem sa iyang posisyon isip chairman sa CITOM Board, si City Councilor Edgardo Labella nagtuong tanang kawani sa gobiyerno nga mokandidato kinahanglan gyung mo-resign.

Matud pang Labella dihang una siyang mikandidato niadtong 1998 mi-resign siya isip director sa Office of the Ombudsman-Visayas.

Hinuon si Jakosalem nagkanayon nga kung ang mga abogado moingon nga bisan ang usa ka contractual employee sa gobiyerno kinahanglang mo-resign kung mokandidato dili siya magpanuko sa pag-resign sa CITOM. Ang kontrata ni Jakosalem aprubahan sa City Council matag unom ka bulan. (BANAT NEWS)