Samsam Gullas gikulbaan bisan.

CEBU, Philippines - Ang apo ni Kongresista Eduardo Gullas sa unang distrito sa lalawigan sa Sugbo nga si Samsam Gullas miangkong nakulbaan sa iyang pagdagan pagka-kongresista bisan wala pay klaro kung kinsa iyang makaatbang.

Hinuon daku ang iyang kahangop tungod sa mainitong pagdawat kaniya sa katawhan sa unang distrito.

Si Samsam kinsa nagpanuigon pa og 27-anyos nagkanayon nga malipayon siya sa iyang pagsuroy-suroy sa mga lugar sa unang distrito tungod sa ka mainiton sa pagdawat sa mga kapitan kaniya ug sa mga molupyo sa lugar.

Bisan og walay klarong moatbang kaniya wala gihapon mokompiyansa ang batan-ong Gullas.

“Malipayon ko sa sige og suroy-suroy… apan walay kompiyansa gyud kay kung si Papa Eddie pa ang paestoryahon, kun duna kay gikahadlokan mahadlok ka nga mapildi… pero sa end of the day ang akong gisaligan kadto ra gihapon ang akong gipangsuroy…sila ang akong gikasaligan ug swerte kaayo ko nga nindot gyud ang ilang pagdawat nako and it’s because of what Papa Eddie did,” ni Samsam pa kinsa miangkon sa una na-pressure gyud siya.

“Na-pressure gyud ko pag-start, diri gyud nagsugod I love doing this pag-adto nako bilib kaayo sa mga kapitan nindot kaayo ang ilang pagdawat, bisan pa ang mga mayor, ang mga konstituwente nindot gyud kaayo sa ilang pagdawat morag haom kaayo ko sa ilang kasing-kasing maong inspired gyud kaayo ko,” paambit ni Samsam.

Mipasalig hinuon kini sa mga kapitan nga tabangan sa ilang mga proyekto kun siya maoy mapili. Sa pagkakaron si Samsam nag-agad sa tabang gikan sa maong mga opisyal sama sa ilang gihimo ngadto sa iyang apohan.

Usa sa giplanohan ni Samsam nga ihatag ilabi na sa bukirong mga barangay mao ang electrification project ug patubig tungod kay nasuta niya nga dunay mga lugar sa unang distrito nga naglisod niini.

Si Samsam mo-file sa iyang certificate of candidacy karong Oktubre 4 nga adlaw’ng natawhan sa iyang apohan nga si Norma “Mingming” Selma-Gullas sa alas-10:45 human sa Santos nga Misa diha sa Our Lady of Guadalupe Parish Church uban sa mga mayor, bise mayor, konsehales ug mga kapitan sa unang distrito.  (BANAT NEWS)