Pag-ayo sa airport gikalipay ni Radaza

 CEBU, Philippines - Gihangop  ni  Mayor Paz Radaza  sa dakbayan  sa Lapulapu  ang  laraw  sa pagtukod  og bag-ong  passenger terminal sa Mactan Cebu International Airport (MCIA).

Kini  tungod  kay  mituo  si Radaza  nga  dako kaayo kini  og kahulogan alang sa kauswagan  sa industriya  sa  turismo  sa maong  dakbayan.

Ang maong  reaction  gihimo  ni Radaza  human  niya  hisayri  ang  laraw  sa Aboitiz Equity Venture, Inc. ug Ayala  Corporation  nga  maoy  mangunay  sa pagtarok  sa nahisgutang  passenger  terminal.

Ang tagdumala  sa duha  ka higanteng  kompaniya  nakakab-ot  sa maong plano  kay  gusto  nilang ang  ikaduhang  labing  dako  nga  tugpahanan  sa nasud, dili mabiyaan  kun  ang hisgotan  mao  ang  ka-moderno niini sa  tibuok  kalibotan.

Si Radaza   miingon  nga dako siya og pagsalig sa katakus   sa Aboitiz ug Ayala nga makig-alayon sa goberno sa katukoran sa P10 bilyones nga proyekto  sa paghimong   moderno  sa MCIA. 

Gumikan niini subling gipahimangnoan ni  Radaza ang mga kadagkoan sa MCIAA sa ilang obligasyon sa buhis  nga  mokabat og P1.5 bilyones.

Miingon  ang  mayor  sa Lapulapu  nga  dako kining   sagpa  kaniya isip mayor kung dili niya makolekta ang maong kantidad  gikan  sa MCIA .

Nagkanayon si Radaza  nga kanunay lang siyang gisaad-saaran sa  mga  kadagkoan  sa tugpahanan  apan hangtud  karon wala niini  tumana  ang  maong  saad

Alang  kaniya  nga dako na kaayo  og mahimo ang maong kantidad alang  sa  mga kakulangan  sa mga  tunghaang elementary  ug  high  school  sa dakbayan.  (/WC) (BANAT NEWS)