Tanod patay sa sukmag

CEBU, Philippines - Namatay sulod sa tambalanan ang 68-anyos nga tanod human kini gisukmag sa usa ka hubog nga iyang gikalalis sa barangay Maravilla lungsod sa Tabuelan. niadto pang miaging semana apan namatay ang biktima niadto lang miaging adlaw.

Ang biktima mao si Romeo Ponce, 68, tanod sa maong lugar samtang ang suspek mao si Jose Baflor, 34, nagpuyo sa sitio San Jose sakop sa nahisgutang barangay.

Matud ni SPO1 Adolfo Ballovar sa Tabuelan Police dihang nahinabi sa Banat News ang pagpanukmag nahitabo niadto pang milabay’ng semana apan niadto lang Lunes namatay ang tanod.

Sumala pang Ballovar nag-duty ang biktima niadtong tungora ug miresponde tungod sa reklamo kabahin sa pagpamaoy sa suspek gumikan sa kahubog.

Pag-abot ni Ponce gibadlong niya si Baflor tungod kay gikatahong nagbinastos na kini sa mga tawo apan gikatahong nasuko ang suspek ug gi-wallop ang biktima sa nawong. Tungod sa pangidaron ug wala makabantay diretso og ka knockout ang biktima sa sementadong dalan ug gidudahang naigo ang ulo niini sa semento.

Daling gihatud sa Vicente Sotto Memorial Medical Center ang nawad-an og panimuot nga si Ponce apan sumala pang Ballovar nakabsan kini sa kinabuhi niadtong milabay’ng adlaw.

Gikatahong nagdugo ang ilawom sa ulo ni Ponce ug maoy gituohang nakaingon sa kamatayon niini sumala pa sa report sa DyDD.

Ang suspek nagtingkagol na karun sa karsel human madakpi human sa hitabo ug napasakaan na og tukmang sumbong. (EIM)   - BANAT NEWS