Ang Kasaysayan Karon, Agosto 17

Kissproof lipstick

1906— Natawo ang Amerkanong si Hazel Gladys Bishop kinsa usa ka chemist ug cosmetic executive kinsa maoy nakaimbento sa non-smear lipstick o lipstick nga dili maka-mantsa o gitawag kaniadto og kissproof lipstick. Si Bishop nakadiskubre niini ginamit ang mga kahimanan sa kusina sa iyang balay ug iyang nadiskubrehan nga dili kini basta mapapas kumparar sa ubang gibaligyang lipstick. Tungod sa iyang imbensyon miabot ngadto sa 10-milyones dolyares ang balor sa iyang gitukod nga kompanya sa lipstick.

Bakuna vs tipos sa US

1870— Gipanganak ang unang malampusong U.S. typhoid fever vaccine. Si Frederick Fuller Russell kinsa nahimong assistant surgeon sa U.S. Army gipadala niadtong 1908 ngadto sa Uropa aron tun-an ug sination ang pagpamakuna sa mga sundalong Briton ug Aleman (Germans). Gamit ang nakat-unan gitukod ni Russell ang Army Medical Museum aron himuon ang maong bakuna. 1911 gihimong rekisitos sa mga mosulod sa militar sa US nga magpabakuna kontra typhoid fever.

Unang pedestrian nga nabanggaan sa UK

1896— Ang unang pedestrian nga nadasmagan patay og de-makinang sakyanan sa Britanya mao si Bridget Driscoll nga taga Croydon, Surrey. Siya nadasmagan sa terasa sa Crystal Palace, London, sa usa ka awto nga gi-road test sa gikusgong 4 mph, namatay siya tungod sa kadaot sa ulo. Ang maong sakyanan gipanag-iya sa Anglo-French Motor Car (Roger-Benz) Company, nga buot unta nilang ipakita sa publiko nga maayong matang sa transportasyon komparar sa tartanilya. Nasuta nga ang test-driver nga si Arthur Edsell tulo pa ka semanang nakat-on og drive ug nagpunay kini og tabi sa maanyag nga babayeng pasahero dihang nahitabo ang aksidente. Wala siya mapriso ug wala makabayad ang kompanya sanglit gidesisyonan lang kini sa korte nga "Accidental Death."