Wanted criminal sa Lanao nasikop sa Mandaue

CEBU, Philippines - Usa ka “most wanted person” sa lungsod sa Kapatagan, Lanao Del Norte ,nasikop sa kapolisan didto sa tambalanan dakbayan sa Mandaue sa miaging Lunes sa buntag.

Ang nasikop mao si Melvin Boladaco, 46, kinsa gitambalan sa sakit nga hypertension   sa Eversely Child Sanitarium Hospital sa barangay Jagobiao dakbayan sa Mandaue.

Si Chief Inspector Joie Yape Jr. sa Criminal Investigation Detection Group (CIDG) sa Lanao Del Norte mibutyag nga niadtong tuig 2002 si Boladaco maoy suspetsado sa pagpusil patay sa usa ka manindahay og balot ug kanhi asset sa kapolisan didto sa Kapatagan.

Human sa maong hitabo si Boladaco misibat nganhi sa Sugbo ug tungod sa Community Investigative Support sa CIDG sa Sugbo nahibaw-an niini ang nahimutangan sa suspetsado. Dala sa kapolisan ang warrant of arrest sa kasong murder batok kang Boladaco nga giluwatan ni Judge Alan Flores, acting judge sa Branch 21 sa lungsod sa Kapatagan. (Brenda D. Batuto ug Niña G. Sumacot sa The Freeman/WC)

 Lechonan sa manok naugdaw

Ni Darrel Carumba

Gibana-bana nga mokabat sa P169 mil ang balor sa kadaot sa sunog nga miugdaw sa usa ka letchonan sa manok sulod sa karaang merkado publiko sa barangay Poblacion, lungsod sa Liloan niadtong Lunes sa gabii. Ang Vinyang’s Lechon Manok nga naabo gipanag-iya ni Virginia Buhay, hingkod, nga taga lungsod sa Liloan.

Si FO3 Edwin Jopia sa Liloan Fire Station mibutyag sa Banat News nga nadawat nila ang alarma alas 9:20 sa gabii ug sud lang sa singko minutos na kontrolar ang kayo nga nakasilab usab sa kasikbit nga tindahan sa maong lechonan.

Subay sa inisyal nga imbistigasiyon, nasayran nga human manira ang tag-iya sa   maong lechonan kalit lang kining miaso dayong ulbo sa kayo human sa pipila ka minutos.

Nasuta nga ang kayo naggikan   sa linya sa kuryente sa maong tindahan nga gituohang grounded.

Gibana-bana sa kabomberohan nga mokabat sa P160 mil ang kinatibuk-ang danyos sa maong sunog. Hinuon walay naangol ug nakalas sa maong katalagman.

(BANAT NEWS)