CEBU, Philippines - Gitumbok ni Congressman Pablo John “PJ” Garcia nga wala mopadayag sa iyang tinguha si 2nd district board member Wilfredo Caminero nga magpapili isip kongresista sa second district kontra ni incumbent 2nd district Representative Pablo Garcia.
Si PJ Garcia kinsa maoy kandidato pagka-gobernador sa One Cebu Party mibutyag sa taga media nga dili tinuod ang mga huhungihong nga may laraw nga magpapili sa pagka-magbabalaod sa ikaduhang distrito si Caminero.
Hinuon ang maong isyu malagmit makabaton og katumanan kun mahinayon ang pagtunga sa ikaduhang distrito sa lalawigan.
Matud pa ni PJ Garcia nga adto unta mokandidato si Caminero sa bag-ong matukod nga distrto sa habagatan.
Sa pagkakaron wala pa kahatagi og hustong aksyon sa ubos balay balaoranan ang balaodnon nga gipasaka ni Kongresista Pablo Garcia bahin sa pagtunga sa ikaduhang distrito. Gusto ni Garcia nga masilbihan og tukmang mga proyekto ang nagkalainlaing lungsod sa ikaduhang distrito kun mabahin kini tungod kay may moatiman man nga laing magbabalaod sa katunga niini.
Matud pa ni Garcia nga sa pagkakaron naghinobra kadaghan ang mga lungsod nga sakop sa ikaduhang distrito busa gagmay na lang kaayo ang bahin sa matag lungsod gikan sa priority development assistance fund (PDAF) sa matag kongresista.
Hinuon matud pa ni PJ Garcia nga matag karon ug unya adunay mga nagkalainlaing kaugmaran nga mahitabo sa dagan sa politika sa Sugbo ug mao kini ang ilang gitun-an samtang layo pa ang eleksyon. (BANAT NEWS)