CEBU, Philippines - Naalarma ang mga doktor sa Vicente Sotto Memorial Medical Center tungod sa nakitang impeksyon ug nagbutang sa peligro sa kinabuhi sa quadruplets nga gipanganak sa maong tambalanan.
Ang maong mga masuso nga duha ka babaye ug duha ka lalaki hugot nga giobserbahan ug gibutang sa mga isolated rooms sa Neonatal Intensive Care Unit ug isolated room sa pediatric ward. Ang resident attending doctor nga si Dr. Cristine Abugay mibutyag nga dili matino kun kanus-a makagawas ang quadruplets tungod talandogon pa ang ilang kahimtang.
Ang tulo kasamtangan nga anaa sa Neonatal Intensive Care Unit samtang ang usa niini anaa sa isolated area sa pediatric ward tungod kay posibleng aduna kini kagaw nga makatakod sa tulo ka igsuon.
Butyag usab ni Abugay nga sa ilang gihimong laboratory test sa upat ilang nakita nga aduna silay infection sa lawas.
Ideklarar silang piskay na ang lawas kung makitang husto na ang ilang timbang ug gidak-on, matud pang Abugay.
Sa gipagawas nga medical bulletin sa tambalanan, ang unang batang lalaki adunay gibug-aton nga 1400 grams, ang ikaduhang migawas nga batang babaye adunay gibug-aton nga 850 grams, ang ikatulong bata nga migawas nga lalaki aduna usab gibug-aton nga 1400 grams ug ang ikaupat nga babaye 1000 grams.
Sulod na sa tulo ka adlaw nga gihatagan og antibiotics ang quadruplet, gihulagway ni Abugay nga ang survival stage sa quadruplets anaa sa 50-50 apan ilang gihimo ang tanan aron sila mabuhi. Niadtong petsa 4 sa Hulyo gihimugso sa inahang taga lungsod sa Argao ang unang bata apan nabantayan nilang duna pay sulod ang sabakan niini maong gidala kini og tambalanan.
Nagproblema ang mga ginikanan sa maong mga bata tungod sa kalisod nila sa panalapi aron ipalit sa mga tambal ug pagkaon. (BANAT NEWS)