2 minors namaligya'g shabu

CEBU, Philippines - Naaktuhan sa kapolisan ang duha ka minor de edad nga namaligya og gituohang shabu diha sa Poblacion lungsod sa Cordova sa milabay’ng gabii.

Ang mga nadakpan pulos nag-edad og 17-anyos nga mga residente sa maong dapit human nakuhai og tulo ka paketeng ‘shabu’ sa grupo nila ni PO2 Charlie Valmoria, PO2 Hariefel Espinosa ug PO1 Noem Rosirlosa sa Intelligence Section sa kapolisan sa Cordova.

Ang maong mga polis misusi unta sa report kabahin sa presensya sa mga armadong lalaki sa maong dapit dihang ilang nakita sa akto ang duha nga kadudahan ang mga lihok ug may gitunol sa usa ka wala mailhing lalaki.

Dihang ilang gisitar ang duha ug gisusi, tulo ka paketeng may sulod nga gidudahang shabu ang ilang nakuha ug P200 nga gituohang halin niini gikan kanila. Dali usab nga nahanaw ang lalaking ilang gitunolan, ang nakuhang gituohang shabu gikatakdang ipasusi sa PNP Crime Laboratory-7 alang sa pagtino kun ilegal nga drugas ba gyud kini.

Ang mga sindikato sa ilegal nga drugas sumala pa sa kapolisan migamit na og mga bata sa ilang operasyon tungod sa Juvenile Justice Act nga nagprotiher sa kabataan gikan sa criminal liabilities.(/EIM)  - BANAT NEWS