CEBU, Philippines - Nasuwertihan pa ang usa ka pintor kay igo lang natapsingan sa bala ang agtang niini human siya pusila sa iyang silingan didto sa 200 Avenue sa barangay Poblacion, lungsod sa Carmen sa miaging kaadlawon.
Ang biktima mao si Ramises Peralta, 42, sa maong dapit, samtang ang suspetsado giila nga mao si Gerson Enriquez, 21, usa ka PUJ driver ug silingan sa biktima.
Si SPO2 Simplicio Gibo sa kapolisan sa maong lungsod nga nahinabi sa Banat News miingon nga naglakaw ang biktima sa karsada pauli sa ilang balay dihang gisugat kini sa suspetsado ug kalit nga gipusil sa wala hisayring kalibre sa armas de fuego ug sa walay igong hinungdan.
Ang biktima nga nakakita gyud sa armas nga gipunting sa iyang agtang igo lang nakahupo og dyutay ug maoy hinungdan nga mitapsing lang ang bala sa iyang ulo.
Kay kun nasentro pa pagkaigo ang iyang agtang, aw wa gyuy suwerte matud pa sa biktima nga nagpanlingo sa kakuyaw.
Ang suspetsado nga nagtuo nga nabuslot na ang ulo sa biktima midagan kini pahilayo sa maong dapit apan nadakpan kini sa kapolisan sa follow up operation nga gihimo.
Ang biktima dali nga gihatod sa Vicente Sotto Memorial Medical Center sa dakbayan sa Sugbo.
Mibutyag kini sa kapolisan nga wala sila magkaaway ug ang suspetsado busa nagtuo kini nga nasaypan lang siya nga kontra sa naulahi.
Nagkagulkol na sa prisohan ang suspetsado samtang giandam na ang tukmang kiha batok kaniya. (/WC) - BANAT NEWS