CEBU, Philippines - Andam nga mobayad ang kagamhanan sa lalawigan sa Sugbo sa dakong utang sa kagamhanan sa dakbayan sa Mandaue sa pagpanday sa Cebu North Bus Terminal (CNBT).
Mao kini gibutyag sa 4th District Board Member Sun Shimura kinsa maoy misang-at og resolusyon aron ikapaubos sa pagdumala sa Kapitolyo ang CNBT.
Matud pa ni Shimura nga mipasalig si Gobernador Gwendolyn Garcia nga abagahon pagbayad ang utang sa dakbayan sa Mandaue gikan sa Japanese International Cooperation Agency (JICA) nga maoy mipanday sa CNBT.
Miingon si Shimura nga gawas sa pagbayad sa utang sa Mandaue ngadto sa JICA, misugyot usab si Gobernador Garcia nga paliton ang tibuok luna nga natarokan sa maong terminal.
Ang gisugyotan sa gobernador mao si manlalaban Raul Sanchez, ang representante sa kagamhanan sa Mandaue sa panagtagbo nga gipatawag sa gobernador didto sa buhatan ni Shimura.
Hinuon gipasalig ni Sanchez nga iyang ipadangat ang sugyot ni Gobernador Garcia ngadto kang Mayor Jonas Cortes sa Mandaue.
Gipasalig ni Gobernador Garcia nga palambuon niya pag-ayo ang CNBT sama sa kaanindot ug kamauswagon sa Cebu South Bus Terminal (CSBT) nga ubos sa pagdumala sa Kapitolyo.
Mitambong usab sa maong tigum mao sila si Cebu City Administrator Jose Marie Poblite; Cebu City Consultant Eugene Elizalde; Provincial Legal Officer Marino Martinquilla; Richard Corominas, ang presidente sa Cebu Provincial Bus Operators Association ug uban pa.
Hinuon gitakda nga magtigum pag-usab ang maong grupo unya sa Mayo 15, 2012 uban sa kadagkoan sa Kooperatiba nga kasamtangan nagdumala sa CNBT. – (BANAT NEWS)