CEBU, Philippines - Gipasakaan og kaso sa usa ka inhenyerong negosyante ang Cebu City Bantay Dagat Commission (CCBDC) gumikan sa paglapas sa balaod may labot sa Republic Act 3019 nga gitawag og Anti-Graft and Corrupt Practices Act.
Ang kihante mao si Engineer Romeo Villaceran batok nila ni Project Director Ranulfo Sebusa sa (CCBDC), Nathaniel Lucero sa Bureau of Fisheries and Aquatic Resources (BFAR) ug ang wala mailhing mga miyembro sa CCBDC.
Si Villaceran tag-iya og panagatan ug nangabang og usa ka trak de-karga nga gikargahan sa mga kuha nila niadtong Abril 11, apan alas-10 sa gabii gidakop kini sa CCBDC.
Pagka alas-2 sa kaadlawon (Abril 12) usa ka Ruel Espina ang mipahibawo kaniyang ang isdang iyang gipahatud sa Pasil Fish Market gikumpiskar na kay giingong nakuha kini pinaagi sa dinamita.
Gihimakak niyang nakuha ang maong mga isda gamit sa illegal nga paagi sa iyang panagatan tungod kay wala siya malambigit sa bisan unsang illegal nga paagi sa panagat.
Dihang miinsister siya ngadto kang Nathaniel Lucero sa BFAR wala siya paminawa niini.
Midugang usab siya nga dili siya makatuong sa 352 ka mga banyerang isda, upat ra ang giingong dili kuha sa ilegal nga pagpanagat.
Matud pa sa reklamo tungod sa gibuhat sa CCBDC naalkanse og dako ang iyang negosyo hinungdan nga nagpatabang siya kang Atty. Julius Ceasar Entise aron mopasaka og reklamo ngadto sa Ombudsman for the Visayas. (/EIM)(BANAT NEWS)